Plaatnportret: Paranoid – Ozzy Osbourne

De vèrschrikkelukke coronaperiode ligt gelukkig achter oons al beweert de WHO det de komst van een volgende, velle dodelukker virus slechts een kwestie van tied is. Vremd genog bint ze doar in Engelaand à een vaccin veur teegn àn’t ontwikkel’n terwijl ’t profiel van ’t virus nog onbekend is.

Hoppeluk valt ’t oammoa met en past de virologen en vaccin-ontwikkelaars better op de winkel dan det ze in Wuhan deden. D’r bint nameluk luu die denkt det ’t coronavirus eind 2019  juust uut det laboratorium is ontsnapt, ’t laboratorium woar ok Koopmans met vleermóéz’n in de weer was en dan bedoel ik nie de Koopmans van de pannekoek’n mà oonse Marion.

’t Is slechts 1 van de theorieën die rond goat en ’t is nie de bedoeling det uulle d’r paranoïde van wut. Det wön Ozzy Osbourne ok nie toen hij tijdens een concert op 20 januari 1982 de kop van een lēēmtige vleermoes ofbeet. Hij dach det ’t een nep-vleermoes was die een fan op ’t podium gooit had en toen bleek det ’t een echn was mosse met gaank noar ’t zíék’nhuus.

Ozzy Osbourne is een vremde vogel mà det hef olles te maakn met zien jeugd woarin hij het ol die tied o.a. mos dóén met mà 1 paar sökk’n en 1 paar schóéne.
Toene 14 joar was prèbeern hij zelfmoard te pleegn mà hij wön redt deur zien Vá die net thuus kwaam. Een aantal criminele joar’n volgd’n tötdet hij in een slachthuus ging wark’n en geld vèrdíén. In det slachthuus kreeg hij dan weer zien fascinatie veur dier’n en de dood die as een rooin droad deur zien lēēm loopt.

Ondaanks de bittere armoe moedigd’n Ozzy’s Móé hum àn um wat met muziek te goan dóén en koch zien Vá met geleend geld een microfoon en vèrstarker veur hum. En det hef zich uuteindeluk uutbetaald want Ozzy Osbourne hef meer dan 100 miljoen albums vèrkoch.

Zien lēēm is echter oltied turbulent e-wes en e-bleem met drugs- en drankmisbruuk. Ok beet hij ooit de kopm of van 2 lēēmtige dóém. En Ozzy had las depressieve periodes en van waanideejn, bèveurbeeld um zien vrouw te vèrmoard’n woar hij in de zommer van ’82 met e-trouwd was. In detzelfde joar kwaam zien beste moat um ’t lēēm bie een vliegtuugongeluk.

Solo hef Ozzy Osbourne velle success’n e-had met o.a. Crazy train, No more tears en Dreamer.
Ok had hij begin disse eeuw een goed bekekk’n reality show.

In dit Plaatnportret goa ik echter terugge noar de begintied met Black Sabbath, een naame die ontleend is àn joawè … een horrorfilm (van Boris Karloff, ’t vroggere Monster van Frankenstein).
Op 19 september 1970 vèrscheen van Black Sabbath’s twidde album ’t nummer Paranoid.

Oaver ’t lēēm van Ozzy Osbourne (3 december 1948) valt nog zo akelig velle meer te vèrtell’n, det det hier gin beginn’n àn is. Paranoid echter gef, alhoewel Ozzy toen pas 21 joar was, 1 facet hiervan goed weer en det bint de periodes det hij ’t nie zag zitt’n en zich hoogst ongelukkig en depressief vuuln.

Mà telkens hef hij zich d’r weer deurhèn e-sloane. Ozzy Osbourne is een fenomeen, een lēēvende legende en zo is ok Paranoid: