Luttenberg Top700
Electromusic FM RADIO ONLINE 24/7
play_arrow
London Calling Podcast Yana Bolder
play_arrow
Summer Festival Podcast Robot Heart
play_arrow
Electronic Trends Podcast Aaron Mills
play_arrow
New Year Eve Podcast Robot Heart
play_arrow
Techno Podcast Robot Heart
play_arrow
Flower Power Festival Podcast Robot Heart
play_arrow
Tech House Podcast Robot Heart
play_arrow
Winter Festival Podcast Robot Heart
Plaatnportret geschreven door: Leo van Krukkert.
De Poasdaage bint ànstoande, al is veur een hoop luu de betekenis hiervan of-e-zwakt of zelfs kats vot. Zo adverteert supermarkt’n d’r eigeluk ok nie meer met mà nuumt ze ’t teegnswoarigs Lentefeest. En joa, vèdaage de dag stoat d’r sowieso een hoop tradities op de tocht. De ondergang van de íéne en tegelijkertied de opkomst van een aandere religie hef doar zeekes met te maakn.
De naame Jesus Christus echter, kent nog steeds iederíéne op disse aardbol en wat aj d’r ok van vind, zien bosschop hef – wè – een positieve uutstraling, nameluk die van liefde, acceptatie en verzoening en bevat bèveurbeeld gin middeleeuwse oproepm um ongeleuvig’n as vark’ns te zíén die ummelegt mut wön.
Vèdaage de dag hebt velle luu hun Geleuf in-e-ruild veur wat aans um inspiratie, krach en voldoening uut te putt’n. Íéne doarvan is voetbal. In het nog steeds zeer katholieke en ok voetbalgekke Brazilië zegt ze nie ‘de bal is rond’ mà ‘God is rond’, een saamtrekking as’t ware van de 2 doar belangriekste ‘religies’.
En dan hej ok nog de volgende uutspraak:
“Ik haat het als mensen Cruijff met God vergelijken! Ik bedoel, hij is goed, maar hij is geen Cruijff.”
En det brengt mie dan weer bie die aandere wēreldberoemde J.C. met ok een wēreldwiede naamsbekendheid; Johan Cruijff (*25 april 1947). Hij is met afstand de beste voetballer die Nederlaand ooit voart e-brach hef. In 1999 wön hij vèrkēūz’n töt Europees voetballer van de 20ste eeuw en noa Pelé de op 1 noa best’n van de wēreld. Ok was hij 3 moal Europees voetballer van ’t joar.
Cruijff had een oonmeunig inzich. Hij was donders technisch en had een flits’nde startsnelheid. En ok zien handelingssnelheid was super. Cruijff was as kwikzilver en hoast nie teegn te hoaln. Vèrdedigers steun veur schut.
Vèdaage, 24 meert is zien sterfdag, 8 joar leene à weer.
Ok Johan Cruijff twiefeln, zo as zo velle luu, àn ’t Geleuf. Zo hef hij e-zeg: “Ik ben niet gelovig. In Spanje slaan alle 22 spelers een kruisje voordat ze het veld opkomen. Als dat werkt, zal het dus altijd een gelijkspel worden.”
Mà aanderzijds bint de volg’nde woard’n ok van hum: “Ik heb veel kwaliteiten gekregen van God. Die kun je niet voor jezelf houden, die zal je moeten delen.”
En zien uutspraak van “In zekere zin ben ik waarschijnlijk onsterfelijk” hef natuurluk olles te maakn met zien naam en faam die nooit vèleurn zal goan. “Want dood ben ik pas” zo zingt dan weer Bram Vermeulen, “als je mij bent vergeten.”
D’r bint prachtige voetbalbeeld’n van Johan Cruijff en ok mooie eerbetonen zo as deze:
(Veur indrukwekkende eerbetonen in Spanje muj i.v.m. kopierecht’n zelf ēēm zuukn op YouTube)
Mà hoe dan ok, ’t Geleuf held velle luu bezig. Zowel luu die 100% oavertuugd bint as luu die twiefelt en zelfs ok luu die nāās in geleufd.
Ikzelf heb mie veur joar’n terugge uut loat’n skríém uut de karke vanwēge de misstanden pleegt deur pastoars en priesters. ’t Instituut Karke hef doarin zeer noadrukkeluk e-faald. Ma det wul nie zegg’n det deurumme geleuv’n of een Geleuf ànhang’n nie deugt.
Zelf heb ik dinge met-e-maakt die ik nooit alleent had kunn’n draagn zonder steun van mien dierbaren.
En argens had ik doarbie ’t idee det d’r ok nog wat aans was wat mie draagn hef. Iets woar ik mie toen àn vast kon klampm en det zich bie mie teegnswoarigs uut in een gerust gemóéd, vrie van angst. Ik geleuve dan ok det ik het wie weet mèschien wè heemoa íéns binne met Lenny Kravitz … denk ik.
Lenny Kravitz (New York, V.S.) is nameluk volledig oavertuugd van de ànwezigheid van een ‘heilzame’ hogere macht. En tegelijkertied is hij d’r ok van oavertuugd dej d’r zelf hier, in dit Aardse lēēm, wat van mut maakn. Disse 2 gegevens bezingt hij in ’t prachtige ‘Believe’ (uut 1993).
Ik wēnse uulle oammoa fijne Poasdaage en beste luu, vèget nie te stemm’n hè veur de Top 700
Plaatnportret geschreven door Leo van Krukkert.’t Is een rare wēreld hè ? ’t Gedoe bie The Voice en ok bie de NPO met Matthijs van Nieuwkerk veurop. En met Theo Maassen en goa zo mà deur. Bie den laatst’n gíét ’t, as de bewering’n klopt, um huuseluk geweld. Elke vorm van huuseluk geweld is vèrschrikkeluk en elk ‘geval’ is d’r íéne tevelle. En bie sommige slachtoffers mond het uut in […]
Post comments (0)