Plaatnportret: Mein Teil van Rammstein

Plaatnportret geschreven door: Leo van Krukkert

Op 22 december 1972 wön d’r 16 oaverlēēvenden e-redt op 3600 meter heugte in ’t Andes gebargte. Sie waan doar 72 daag’n eerder neer-e-stört, saam met 29 aander’n. Slech weer en een navigatiefout waan de oarzaak.

Direkt noa de crash waan nog 33 luu in lēēm die mosn zien te oaverlēēm in barre umstandigheed’n. Veurdeel was wè det de meest’n jonge starke kjeals waan, lid van ‘t Uruguayaans rugbyteam Old Christians Club. Det ze in goeie conditie waan hef vaste hulpm um de extreme kelte, lawines en gebrek àn voedsel àn te kunn’n. Mà de beproeving was zo ongeleufluk zwoar en lang, det d’r uteindeluk nog eens 17 luu zoln stàrm.

De 16 oaverlēēvenden hebt hun lēēm mede te dank’n àn Nando Parrado en Roberto Canessa die met zien tweejn hulp ging’n zuuk’n; een barre tocht van 10 daag’n. Mà d’r was ok nog iets aans woardeur ze oaverlēēm, nameluk deur ’t vleis te ètn van oaverleden reisgenoot’n.

’t Is een ongeleufluk vèhaal. Want goa d’r mà àn stoan, vleis van oe oaverleden moat’n opetn. Toch maakt’n bie de meest’n wroeging uuteindeluk wè plaats veur acceptatie.

Zo zei bèveurbeeld Roberto Canessa: “Ik vroeg mezelf af of ik een menselijk wezen kon zijn dat ik dit deed. Maar ik realiseerde me dat dit de enige manier was om mijn ouders weer te zien.”

Mà tjonge jonge, wat stíét dit in enorm contrast met wat 29 joar laater een zeekere Bernd-Jürgen Brandes dee. Disse Duutser reageern in 2001 op een advertentie woarin Armin Meiwes op zuuk was noar een “jongen tussen de 18 en 30 jaar om te slachten en op te eten”. En Bernd stemde toe!! Een 43 joarige ingenieur uut Berlijn von ’t prima det een aandere ingenieur (40 joar) uut, hoe ironisch, Essen, hum op zol ètn. Beide heer’n ondertekenden nota bene een akkoard hieroaver.

Het ritueel begon met het ofsníé van de penis van Bernd mà det ding bleek muulluk te kokk’n en te bereid’n. ’t Gezameluk opètn doarvan gung dus nie deur temeer Bernd snel vèrzwakk’n deur hevig blóédvèlies. De bizarre details die hierop volgt (en trouwens ok hieràn veurof goat) muj zelf mà is opzuuk’n mà sie bint woarheidsgetrouw want Armin Meiwes hef olles op video vast-e-legd.

Wie hebt hier dus 2 bizarre vèhaal’n oaver kannibalisme woar nog heel velle meer oaver te vèrtell’n valt en oaver te lēēzn is. Zo is d’r oaver de oaverlēēvingsstrijd van het vliegtuigongeluk in de Andes een film e-maakt, te weet’n ‘Alive’ in 1973.

En oaver de ligubere moord in Wüstefeld hef o.a. Rammstein een líéd e-maakt, te weet’n ‘Mein Teil’ in 2004. Doarvan heb ik een video met tekst, in Sallaands (en Duuts en Engels) bie-e-voegd. Doarnoa volgt de orginele video van Rammstein. Een macabere provocerende video zo as de heer’n uut Berlijn wè vaaker maakt hebt.

Ik weet, dit olles draagt noe nie bepaald de Kàsgedachte uut. Behalm dan mèschíén dej gek met oe familie, moat’n en dörpsgenoot’n wēēn mut. En dej dan manks is teeg’n de aander zegt: “Ik binne zo wies met oe, ie bint um op te vrett’n.”

Hoe dan ok hoal ik ’t met ’t Kàsdiner toch mà gewoon bie …. bier en chinees.