Plaatnportret: Bad to the Bone – George Thorogood

Plaatnportret geschreven door: Leo van Krukkert.

Tja, d’r loopt een hoop luu op disse aardbol rond die ‘bad’ bint. Met bad bedoel ik dus nie die kuupe water woar aj in kunt goan zitt’n (en woarin lakker ligg’n nie te doen is). Nee, vèrtaald van uut ’t Engels bedoele ik doar luu met die slech bint. En det kan dan weer wēēn, slech in’t beoefen’n van toafeltennis of iets aans, slech van karakter of slech van de drank etc.

D’r bint de neudige líédties met ‘Bad’ as titel zo as van Michael Jackson of U2.

Of met ‘Bad’ ín de titel zo as ‘Bad moon rising’ van Creedence en ‘Two out of three aint bad’ van Meatloaf.

Mà ‘Bad to the bone’ is van ol die nummers toch wè 1 van de lakkerst’n. ’t Nummer steun in olle 3 edities van de Lutt’nbargse Top 700, woarvan de laatste keer op plekke 542. Aj d’r weer op stemm’n wult goa dan noar: https://www.luttenbergtop700.nl/

Det kan vanof 1 meert töt 1 juni.

Tuss’n 2 haakies, d’r is ok een Nederlandse band, op-e-rich in 1979, die zich ‘Bad to the bone’ nuumt, met ex Bintangsleden in de geleder’n.

’t Album Bad to the bone, met doarop ’t gelieknamige líédtie, is echter 3 joar laater uut-e-brach, nameluk in 1982 en wè deur de Amerikaanse bluesgitarist George (Lawrence) Thorogood en zien begeleidingsband The Destroyers.

Thorogood is geboar’n op 24 februari 1950 en dus is d’r reden um hum noe dit weekend in ’t zönnegie te zett’n. Met zien begeleidingsband hef hij meer dan 20 albums e-maakt en sie bint nog steeds aktief.

Feiteluk is ’t líédtie een bewarking van Mannish Boy (uut 1955) van absolute blueslegende Muddy Waters. Hij skreef det saam met een aandere bluesgrootheid, Bo Diddley. En die spelt op zien beurte weer een rol in de videoclip van Thorogood’s ‘Bad to the bone’. Die bewuste video kuj as laatste biedraage in dit Plaatnportret bekiek’n.

Eers volgt hier de video met Sallaands’n oondertiteling. En wees noe eerluk, zo ‘bad’ is dit heerlukke rocky bluesnummer toch nie ? Dus ik zol zegg’n, velle schik d’r met.