Luttenberg Top700
Electromusic FM RADIO ONLINE 24/7
play_arrow
London Calling Podcast Yana Bolder
play_arrow
Summer Festival Podcast Robot Heart
play_arrow
Electronic Trends Podcast Aaron Mills
play_arrow
New Year Eve Podcast Robot Heart
play_arrow
Techno Podcast Robot Heart
play_arrow
Flower Power Festival Podcast Robot Heart
play_arrow
Tech House Podcast Robot Heart
play_arrow
Winter Festival Podcast Robot Heart
De oavertreffende trap van de TOP700 dit joar hef nie genog treden um uut te drukk’n hoe grandioos editie 2024 was.
Zo hàn wie bèveurbeeld kunstenaars uut-e-neudigd woarvan wie dach’n det ze oammoa met 1 kunstwark àn zoln komm’n. Mà nee, de meest’n brach’n in ànstekkeluk enthousiasme 3, 4 of zelfs 5 wark’n met. En de kwaliteit was flabbergastering goed of in keurig Lutt’nbargs; blēūs oons finaal van de biíéne.
De gastvrieheid van de Elckerlycmedewarkers en -vriewilligers was zeer harteluk. Wuule, TeamTop700, kwaam as vaste bewoners van ‘oonse studio’ heemoa, mà dan ok heemoa niks tekot.
Oonse nieje burgemeister kwaamp à vuste sfeer pruuvn. Hij was onder de indruk van Lutt’nbarg met zien noaberschopmentaliteit. Hij kreeg mooi presenties zo as een pakket van oonse eigenste klompmmaaker Martin. En een knalpot van de ok à oonse eigenste Jan van Brēūkn die ’t àn Rob Zuidema oaverhandign met de legendarische woard’n: “Muj flessie bier hem?”
Dezelfde soart presenties nam special guest Caroline van der Plas een dag eerder ok in onvangst. Helaas moss’n wie heur komst geheim hoaln. Mà mèschien was ’t juust deurum wè det de Top700-site plat gung woarmet kloarbliekeluk àn-e-teunt is det zelfs de modernste computerprogramma’s kunt zwicht’n onder grenzeloze niejsgierigheid.
De live-optredens waan Uniek met hoofdletter u. In een kleine setting, op een klein podium, letterluk kot op ’t publiek vuuln ie een hartverwarmende en ontroerende magie in de oavervolle zaal oaver publiek en artiest’n neerdaaln.
Dit geweldige Top700-evenement was nie meugeluk e-wes zonder inbreng van oonse sponsoren én van video- licht- en geluidsman Leo Grote Schaarsberg. Doarveur dank dank dank !
Ja en dan de líéste zelf. 700 Líédties woarvan ie menig nummer never nooit nie in een aandere líéste teeg’n zult komm’n.
Ol die nummers wön àn mekaare proat deur een heel divers D.J. corps die zich met elke nieje 700-editie meer op hun gemak liekt te goan vuuln.
En det ondaanks de zich met elke dag en op de laatste dag met elk uur en elke minuute opbouwende spanning oaver wie de nieje nummer 1 zol wēēn. Die spanning resulteern dit keer nie in een platgelegde website mà in een warkeluk bomvol Elckerlyc, zowel in de zaal as buutn op ’t terras woar olles (net as binn’n) via een heel groot beeldscharm te volg’n was.
Een verraste en dolgelukkige Hennie Tijs moch dinsdag jl. rond 22.50 uur ’t best bewaarde geheim van Lutt’nbarg en veere umstreekn ànkondig’n. Hennie hef nameluk een geschiedenis met det líéd. Hij “woont d’r in” zegge zelf. Het is ’t líéd van Deep Purple, ‘Child in time’.
Rond de ofgeloopm Kàsdaagn heb ik àn dit líéd een Plaatnportret e-weid.
Het was töt veur de ànvang van disse Top700-editie – en det is wellich velzeggend – verreweg ’t meest beluusterde nummer in mien reeks van meer dan 100 Plaatnportrett’n.
‘Child in time’ stíét op ’t album Deep Purple in Rock en is in-e-geem deur o.a. de dreiging van opniej een wēreldoarlog mà dan íéne met kernwoap’ns. Het is ’t thema van de Koale Oarlog det in de roerige joar’n ’60 deur menige band àn-e-kaart is.
De inspiratie veur de tekst deden de leden van Deep Purple op tijdens een bezuuk àn de Berlijnse Muure woar de grēnswacht’n (the blind man) op olles en iederíéne scheut’n die de grēnze oaver prèbeern te vlucht’n (bullets flying).
Aj geluk hàn wön ie nie raakt. Mà raakt’n ie gewond en kon ie nie meer veerder dan was ’t, aldus Deep Purple, wacht’n op ’t genadeschot (wait for the ricochet, alhoewel een ricochet feiteluk een ofketsende kogel is).
Op det zogenaamde genadeschot begint zanger Ian Gillan vocaal flink en intens uut te pakk’n en de doar dan weer op volgende gitaarsolo beeld de doodsstrijd uut. Dan plots .. valt het líédtie as’t ware stille en begint weer oaverniej; de volgende vluchter uutbeeldend.
In warkelukheid bint d’r minstens 138 mēnsn um ’t lēēm e-köm bie de vluchtpogingen.
Oaver de titel ‘Child in time’, of better, oaver de openingszinne van ’t líédtie, valt trouwens nog wè iets te zegg’n.
Die 1ste zinne muj eigeluk net iets āāns lēēzn dan dej mèschien geneigd bint. Nie van:
“Sweet child in time <komma> you’ll see the line …”
Nee, eigeluk muj de komma noar veurtn skóém en dan kriej:
“Sweet child <komma> in time you’ll see the line …”. Een klein mà nie onbelangriek vèrschul.
Ik zol zegg’n, kiek, luuster en geniet nog íén moal (of vaakerder) noar de nieje nummer 1 van de Lutt’nbargse Top700
Oammoa oonmeunig bedankt. Op noar het lustrum, de 5de editie. Die vindt plaats van 31 juli t/m 4 augustus 2026.
Een beste groet & goed gôan.
De finaledag, dag 5, van de Top700 was een groot succes! Ondanks dat we een beetje tempo moesten maken met het draaien van de nummers, hebben we het gered om de nummer 1 om 23:00 uur te draaien. We begonnen de dag om 08:00 uur. In de ochtend en in het begin van de middag was er weinig ruimte om veel te praten tussen de nummers door. Pas toen we […]
Post comments (0)